Թագաւորն ու Ծովը
Թագաւորի մը հանդիպումը ծովուն, շուքին, անձրեւին, ամպին, գիշերուան եւ երկնքին, ուրուականին, ծառին եւ դեռ բազմաթիւ շնչաւոր ու անշունչ առարկաներու հետ…։ Երբեմն ինքզինքը տկար զգալուն՝ բարկացող, երբեմն՝ իր ուժին զարմացող, երբեմն ալ՝ թագաւորութեան սահմաններէն ներս տեղի ունեցածներուն դիմաց խանդավառուող թագաւորին ամէն մէկ հանդիպումը կը պատմուի նուրբ ու զգայուն փոքր հեքիաթներով։
Բանջարեղէններու ըմբոստութիւնը
Սառնարանին մէջ բաներ մը կը պատահին։ Կարծես ոչ մէկ բան իր տեղն է, մռթմռթոց եւ աղմուկ կը լսուի։ Սառնարանին դուռը գոց է, բայց կը վառի լոյսը։ Բանջարեղէնները, ա՛լ ձանձրացած զիրենք ուտել չուզող մանուկներէն, ապստամբութեան դրօշ պարզած են։
Փոթորիկ
Այս գիրքը պատմութիւնն է Փոթորիկ անունով շնիկին։ Այստեղ, պատկերներն են որ կը խօսին, ո՛չ բառերը։ Փոթորիկ նախ եւ առաջ բարեկամութեան մը պատմութիւնն է։ Անխօս գիրքերու յատկութիւնը այն է, որ զանազան միջավայրերու եւ հանդիպումներու ընթացքին կարելի է գործածել զանոնք մասնակիցներուն հետ միասին պատմութիւններ հիւսելու եւ զրոյցներ զարգացնելու համար։
Բառաշխարհ
«Բառաշխարհ» աշխարհ մըն է ուր տեղ գտած են մեզ շրջապատող եւ առօրեային վերաբերող էակներ, առարկաներ եւ գաղափարներ՝ տուն, խոհանոց, պարտէզ, փողոց, բնութիւն, անասուններ, առողջապահութիւն, սնունդ, հագուստեղէն եւ դեռ ինչե՜ր… «Բառաշխարհ» գիրք մըն է, զոր կարելի է գործածել որպէս ուսուցման օժանդակ աշխատանքի գիրք, որպէս բառապաշարի աղբիւր եւ կամ պարզապէս հաճոյքով թերթատել։
Անտառին գաղտնիքը
Եղնիկը, որ անտառին ամենէն համով կարկանդակները կը պատրաստէ, ամէն օր՝ միայն իրեն ծանօթ գաղտնի տեղէ մը պտուղներ կը քաղէ։ Իր քաղած պտուղներով ու Գաղտնի Համերու Գիրքին օգնութեամբ հրաշքներ կը գործէ խոհանոցին մէջ։ Սակայն օր մը Գաղտնի Համերու Գիրքը կը կորսուի։ Արդեօք յետոյ ի՞նչ պիտի պատահի։
Հիփփօ
Հիփփօ հայերէն եւ թրքերէն լեզուներով մանկական պատկերազարդ գիրքերու հրատարակչատունը կը գործէ Պոլսոյ մէջ։ Հրատարակչատան առաջնահերթութիւնն է հանրային խնդիրները նիւթ ունեցող գիրքերու միջոցաւ հասնիլ երեխաներուն, արծարծելով մանկական գործաւորութիւնը, աղքատութիւնը, գաղթականութիւնը, ընտանիքներուն կողմէ լքուած մանուկները եւ այլ նման խնդիրներ։ Թարգմանական գիրքերու ընտրութեան ժամանակ ուշադրութիւն կը դարձուին նաեւ երեխաներուն մտահոգութիւններուն՝ սէր, ընկերութիւն, աշակերտութիւն, հասունութիւն, եւ այլն։ Միւս կողմէ, […]
Մեղրադդում
Դդում՝ մեղրադդում… Դդումին փորը պարպեցի, մէջը բրինձ լեցուցի… Դդում՝ մեղրադդում… Դդումին փորը պարպեցի, մէջը բրինձ, մեղր ու կարագ լեցուցի… Դդում՝ մեղրադդում… Դդումին փորը պարպեցի, մէջը բրինձ, մեղր ու կարագ լեցուցի, թոնիրին մէջը կախեցի… Ղափամա, ղափամա, -դրացիին անունը- մեզի հիւր թող գայ…
Շաբթուան օրերը
Երկուշաբթի՝ Որո՞ւն գուլպան կը հոտի… Երեքշաբթի՝ Հոտէն քիթս կը փրթի… Չորեքշաբթի՝ Մնացի առանց քիթի… Հինգշաբթի՝ Փրթած քիթս թուքով փակցուցի… Ուրբաթ՝ Վա՛յ, փրթած քիթս թուքով սխալ փակցուցի… Շաբաթ՝ Թուքով սխալ փակած, փրթած քիթս կը ծռի՜… Կիրակի՝ Գուլպա՛դ փոխէ, թուքով սխալ փակած, փրթած, ծո՛ւռ քիթս նորէն չփրթի…
Կաթսային մէջ
Տերեւը՝ որթատունկի տերեւը… Միջուկը՝ սոխը ձէթը բրինձը, ազատքեղը, անանուխը, համեմը եւ լեմոնը… Որթատունկի տերեւը, մէջը դրի միջուկը՝ սոխը ձէթը բրինձը, ազատքեղը, անանուխը, համեմը եւ լեմոնը… Աջէն ձախէն ծալեցի եւ մատիկ մատիկ փաթթեցի… Աջէն ձախէն ծալեցի, մատիկ մատիկ փաթթեցի եւ կաթսային մէջ քով քովի շարեցի… Աջէն ձախէն ծալեցի, մատիկ մատիկ փաթթեցի, կաթսային մէջ քով քովի շարեցի […]
Երկար թել
Կը մանէ, կը մանէ, մեծ մայրիկը կը մանէ, բուրդ ու բամպակ կը մանէ… Կը փաթթէ, կը փաթթէ, մեծ մայրիկը կը փաթթէ, երկար թելը կը փաթթէ… Կը հիւսէ, կը հիւսէ, մեծ մայրիկը կը հիւսէ, պատմութիւն մը կը հիւսէ… Կը պատմէ, կը պատմէ, մեծ մայրիկը կը պատմէ, պատմութիւնը անվերջ է… Այս աշխարհը կլոր է…