Մաման գնաց հանրախանութ…
Տեսակ տեսակ
պանիր տեսաւ,
շուարեցաւ…
Ասի՞ առնէ,
թէ անի առնէ…
Ֆրանսակա՞ն պանիր,
թէ հոլանտական պանիր…
Պուլկարակա՞ն պանիր,
թէ իտալական պանիր…
Յունակա՞ն պանիր,
թէ հայկական պանիր…
Դեղի՞ն պանիր,
թէ ճերմակ պանիր…
Հոտա՞ծ պանիր,
թէ հալած պանիր…
Ծակ ծա՞կ պանիր,
թէ թել թել պանիր…
Այծի՞ պանիր,
թէ ոչխարի պանիր…
Մաման գնաց հանրախանութ…
Տասնչո՛րս տեսակ
պանիր առաւ
ու տուն եկաւ…
Տուն հասաւ
տոպրակը բացաւ
ու ըսաւ՝
– Վա՛յ,
կարա՛գը մոռցայ…
